ວັນກຳມະກອນບໍ່ແມ່ນພຽງແຕ່ສຳລັບກຳມະກອນກໍ່ສ້າງເທົ່ານັ້ນ ແລ້ວອາຊີບໃດແດ່ທີ່ຖືວ່າເປັນກຳມະກອນ?

​ເມື່ອ​ຮອດ “ວັນ​ກຳມະກອນ”, ຫຼາຍ​ຄົນ​ອາດ​ຈະ​ນຶກ​ເຖິງ​​ພາບ​ຂອງ​ກຳມະກອນ​ໃນ​ຂະ​ແໜງ​ການ​ກໍ່ສ້າງ ຫຼື ພະນັກງານໂຮງງານທີ່ເຮັດວຽກໜັກ ແຕ່ໃນຄວາມເປັນຈິງ, ວັນກຳມະກອນແມ່ນກ່ຽວຂ້ອງກັບຄົນທີ່ເຮັດວຽກທຸກປະເພດ. ທຸກໆອາຊີບທີ່ມີບົດບາດສຳຄັນຕໍ່ເສດຖະກິດ ແລະ ສັງຄົມ ບໍ່ວ່າຈະເປັນວຽກການບໍລິການ, ການສຶກສາ ຫຼື ແມ່ນແຕ່ວຽກເຕັກໂນໂລຢີ, ວັນກຳມະກອນແມ່ນວັນທີ່ໃຫ້ກຽດ ແລະ ຮັບຮູ້ເຖິງຄວາມມານະພະຍາຍາມຂອງທຸກຄົນທີ່ອຸທິດຕົນ ແລະ ມີສ່ວນຮ່ວມໃນຂະບວນການພັດທະນາ ແລະ ເຕີບໃຫຍ່ຂອງປະເທດ.

1. ​ກຳມະກອນໃນຂະແໜງອຸດສາຫະກຳ ແລະ ການຜະລິດ

​ພະນັກງານໃນອຸດສາຫະກຳ ແລະ ການຜະລິດມັກຈະໄດ້ຮັບຄວາມສົນໃຈໃນວັນກຳມະກອນ. ຍ້ອນ​ການ​ເຮັດ​ວຽກ​ຢູ່​ບັນດາ​ໂຮງງານ ​ຫຼື ​ສະຖານ​ທີ່​ຜະລິດ​ກໍ່​ຖື​ວ່າ​ເປັນ​ກຸ່ມ​ໃຫຍ່​ທີ່​ມີ​ບົດບາດ​ສຳຄັນ​ໃນ​ການ​ຊຸກຍູ້​ເສດຖະກິດ. ບໍ່​ວ່າ​ຈະ​ເປັນ​ການ​ຜະ​ລິດ​ເຄື່ອງ​ອຸ​ປະ​ໂພກ​ບໍ​ລິ​ໂພກ​, ເຄື່ອງ​ຈັກ​ ຫຼື​ ຜະ​ລິດ​ຕະ​ພັນ​ອຸດ​ສາ​ຫະ​ກໍາ​ຫນັກ​ເຊັ່ນ​: ການ​ຜະ​ລິດ​ລົດ​ຍົນ​, ອຸ​ປະ​ກອນ​ໄຟ​ຟ້າ ​ຫຼື ​ແມ້​ກະ​ທັ້ງ​ອຸດ​ສາ​ຫະ​ກໍາ​ສະ​ບຽງ​ອາ​ຫານ​. ທຸກໆຂັ້ນຕອນຂອງການຜະລິດຕ້ອງການແຮງງານທີ່ມີທັກສະ ແລະ ຄວາມຮູ້ເພື່ອດໍາເນີນການ. 

2. ກຳມະກອນໃນຂະແໜງບໍລິການ

ພະນັກງານຂະແໜງການບໍລິການກໍມີບົດບາດສໍາຄັນໃນວັນກຳມະກອນເຊັ່ນກັນ ທັງພະນັກງານຮ້ານອາຫານ, ພະນັກງານໂຮງແຮມ, ພະນັກງານຂາຍໃນຫ້າງຮ້ານ, ຈົນເຖິງພະນັກງານຂົນສົ່ງສາທາລະນະ ແລະ ຄົນຂັບລົດ, ການບໍລິການທັງໝົດເຫຼົ່ານີ້ຊ່ວຍໃຫ້ຊີວິດປະຈຳວັນຂອງພວກເຮົາງ່າຍຂຶ້ນ ແລະ ສະດວກສະບາຍຂຶ້ນ. ເຊິ່ງພະນັກງານບໍລິການກໍມີບົດບາດສໍາຄັນໃນການສ້າງເສດຖະກິດທີ່ເຂັ້ມແຂງ.

3. ກຳມະກອນໃນຂະແໜງການສຶກສາ

ສາ​ສະ​ດາ​ຈານ ​ແລະ​ ບຸກ​ຄະ​ລາ​ກອນ​ການ​ສຶກ​ສາ​ເຊັ່ນ​: ຄູ​ອາ​ຈານ, ​ຄູ​ອາ​ຈານວິ​ທະ​ຍາ​ໄລ​, ພະ​ນັກ​ງານ​ການ​ສຶກ​ສາ​ລວມ​ທັງ​ຜູ້​ທີ່​ເຮັດ​ວຽກ​ຢູ່​ໃນ​ສະ​ຖາ​ບັນ​ການ​ສຶກ​ສາ​ທຸກ​ຂັ້ນ​ແມ່ນ​ເປັນ​ກຸ່ມ​ທີ່​ສໍາ​ຄັນ​ໃນ​ວັນກຳມະກອນ​. ເຖິງ​ວ່າ​ຈະ​ບໍ່​ໄດ້​ເຮັດ​ວຽກ​ໂດຍ​ກົງ​ໃນ​ຂະ​ແໜງ​ການ​ຜະ​ລິດ ຫຼື ການ​ບໍ​ລິ​ການ ແຕ່​ການ​ສ້າງ​ນັກ​ຮຽນ ຫຼື ຜູ້​ຮຽນ​ທີ່​ມີ​ຄວາມ​ຮູ້ ແລະ ທັກ​ສະ​ ຈະ​ເປັນ​ກຳ​ລັງ​ທີ່​ສຳ​ຄັນ​ໃນ​ການ​ຊຸກ​ຍູ້​ປະ​ເທດ​ໃຫ້​ກ້າວ​ໄປ​ໜ້າ. ນອກຈາກນັ້ນ, ການສຶກສາຍັງມີບົດບາດໃນການພັດທະນາຄຸນນະພາບຊີວິດຂອງຄົນໃນສັງຄົມ.

4. ກຳມະກອນໃນຂະແໜງສາທາລະນະສຸກ

ບຸກຄະລາກອນທາງການແພດ ແລະ ສຸຂະພາບເຊັ່ນ: ທ່ານຫມໍ, ພະຍາບານ, ພະນັກງານໃນຫ້ອງທົດລອງ, ຫຼື ຜູ້ຊ່ວຍທາງການແພດໃນໂຮງຫມໍ ແລະ ຄລີນິກ. ກໍແມ່ນກຸ່ມທີ່ຕ້ອງການທີ່ຈະໄດ້ຮັບການຍອມຮັບໃນວັນກຳມະກອນ. ວຽກງານຂອງພວກເຂົາຊ່ວຍໃຫ້ປະຊາຊົນມີສຸຂະພາບແຂງແຮງ ແລະ ອາຍຸຍືນ. ​ເຖິງ​ວ່າ​ວຽກ​ງານ​ດ້ານ​ນີ້​ຈະ​ປະສົບ​ກັບ​ຄວາມ​ຫຍຸ້ງຍາກ ​ແລະ ຄວາມ​ເຄັ່ງ​ຄຽດກໍຕາມ, ​ແຕ່​ທຸກ​ຄົນກໍ​ຍັງຕ້ອງ​ຮັກສາ​ສຸຂະພາບ ແລະ ຄວາມເຈັບປ່ວຍໃຫ້ແກ່​ປະຊາຊົນ.

5. ກຳມະກອນໃນຂະແໜງເຕັກໂນໂລຊີ ແລະ ວິສະວະກຳ

ແຮງງານໃນອຸດສາຫະກໍາເຕັກໂນໂລຢີ ແລະ ວິສະວະກໍາຍັງມີບົດບາດສໍາຄັນໃນຂະບວນການພັດທະນາເສດຖະກິດ ແລະ ສັງຄົມໃນປະຈຸບັນ. ໂດຍສະເພາະໃນຍຸກດິຈິຕອລ ຄົນທີ່ເຮັດວຽກໃນຊອຟແວ, ວິສະວະກອນ, ນັກພັດທະນາລະບົບ, ຫຼື ແມ່ນແຕ່ຄົນທີ່ເຮັດວຽກດ້ານການເງິນ ແລະ ການຕະຫຼາດອອນລາຍ. ກໍຖື​ວ່າ​ເປັນ​ກຳລັງ​ແຮງ​ງານ​ທີ່​ມີ​ບົດບາດ​ຊຸກຍູ້​ໃຫ້​ປະ​ເທດ​ກ້າວ​ໄປ​ສູ່​ຄວາມ​ຈະ​ເລີ​ນຮຸ່ງ​ເຮືອງ. ການມີເທັກໂນໂລຍີທີ່ທັນສະໄຫມຊ່ວຍສ້າງນະວັດກໍາ ແລະ ເພີ່ມປະສິດທິພາບໃນການດໍາເນີນວຽກງານຕ່າງໆ.

6. ກຳມະກອນໃນຂະແໜງກະສິກຳ

ເຖິງວ່າຈະມີການພັດທະນາທາງດ້ານອຸດສາຫະກຳ ແລະ ເຕັກໂນໂລຊີຫຼາຍດ້ານ, ແຕ່ອີກກຸ່ມໜຶ່ງທີ່ສຳຄັນທີ່ບໍ່ຄວນລືມແມ່ນແຮງງານກະສິກຳ ເຊິ່ງມັກຈະຖືກມອງຂ້າມ ແຕ່ຕົວຈິງແລ້ວກຸ່ມນີ້ຍັງເປັນຜູ້ຜະລິດສະບຽງອາຫານ ແລະ ຊັບພະຍາກອນທີ່ສຳຄັນທີ່ສຸດ ເຊິ່ງເຮັດໃຫ້ເຮົາມີຊີວິດຢູ່ຕໍ່ໄດ້ໃນທຸກມື້ ກໍຄືຊາວນາ, ຊາວສວນ ແລະ ຊາວກະສິກຳ. ເຂົາເຈົ້າເປັນກຳມະກອນທີ່ເຮັດວຽກໜັກໃນທຸກໆລະດູເພື່ອຮັບປະກັນວ່າທຸກຄົນສາມາດເຂົ້າເຖິງສະບຽງອາຫານ ແລະ ຊັບພະຍາກອນທີ່ຈຳເປັນຕໍ່ການດຳລົງຊີວິດ.

7. ກຳມະກອນພາກລັດ

ພະນັກງານລັດ ແລະ ລັດຖະກອນ ກໍແມ່ນກຸ່ມໜຶ່ງທີ່ສຳຄັນໃນວັນກຳມະກອນ. ບໍ່​ວ່າ​ຈະ​ເປັນ​ພະນັກງານ​ລັດຖະກອນ ຫຼື ​ເຈົ້າ​ໜ້າ​ທີ່​ຈາກ​ອົງການ​ຕ່າງໆ ຫຼື ​ແມ່ນ​ແຕ່​ຕຳຫຼວດ ​ແລະ ທະຫານ​ກໍ​ເຮັດ​ວຽກ​ໃນ​ຫຼາຍ​ໜ້າ​ທີ່​ສຳຄັນ ​ເຊັ່ນ: ຮັກສາ​ຄວາມ​ເປັນ​ລະບຽບ​ຮຽບຮ້ອຍ, ບໍລິຫານ​ວຽກ​ງານ​ຂອງ​ລັດຖະບານ, ຮັກສາ​ຄວາມ​ປອດ​ໄພ.

8. ກຳມະກອນໃນຂະແໜງວິສາຫະກິດຂະໜາດນ້ອຍ ແລະ ກາງ (SMEs).

ວິ​ສາ​ຫະ​ກິດ​ຂະ​ຫນາດ​ນ້ອຍ ແລະ ຂະ​ຫນາດ​ກາງ (SMEs) ແມ່ນ​ກົນ​ໄກ​ທີ່​ສໍາ​ຄັນ​ທີ່​ຈະ​ຊຸກ​ຍູ້​ເສດ​ຖະ​ກິດ​ຂອງ​ປະ​ເທດ. ໂດຍສະເພາະໃນການສ້າງວຽກເຮັດງານທຳໃຫ້ແກ່ປະຊາຊົນທົ່ວໄປ. ບໍ່​ວ່າ​ຈະ​ເປັນ​ຮ້ານ​ຄ້າ​ຂາຍ​ຍ່ອຍ, ອຸດ​ສາ​ຫະ​ກໍາ​ເບົາ ຫຼື​ ການ​ບໍ​ລິ​ການ​ເຊັ່ນ: ​ຮ້ານ​ຄ້າ​ທ້ອງ​ຖິ່ນ, startups ແລະ ​ການ​ບໍ​ລິ​ການ​ພິ​ເສດ, ທຸກ​ຄົນ​ໃນ​ຂະແໜງການເຫຼົ່າ​ນີ້​ລ້ວນມີ​ບົດ​ບາດ​ສໍາ​ຄັນ​ໃນ​ການ​ສ້າງ​ໂອ​ກາດ​ການ​ເຮັດ​ວຽກ ​ແລະ ​ການ​ພັດ​ທະ​ນາ​ເສດ​ຖະ​ກິດໃຫ້ແກ່ປະເທດຊາດ.

ສະຫຼຸບ

ວັນ​ແຮງ​ງານ​ບໍ່​ພຽງ​ແຕ່​ເປັນ​ວັນ​ໃຫ້​ກຽດ​ແກ່​ກຳ​ມະ​ກອນ​ໃນ​ອຸດ​ສາ​ຫະ​ກຳ​ໜັກ ຫຼື​ ກໍ່​ສ້າງ. ​ແຕ່​ກໍ​ຍັງ​ເປັນ​ວັນ​ທີ່​ພວກ​ເຮົາ​ຄວນ​ໃຫ້​ຄວາມ​ສຳຄັນ​ຕໍ່​ແຮງ​ງານ​ໃນ​ທຸກ​ຂະ​ແໜງ​ການ​ທີ່​ມີ​ສ່ວນ​ຮ່ວມ​ໃນ​ການ​ສ້າງສາ ​ແລະ ພັດທະນາ​ປະ​ເທດ. ​ໃນ​ຂົງ​ເຂດ​ການ​ບໍລິການ, ການ​ສຶກສາ, ສາທາລະນະ​ສຸກ, ​ເຕັກ​ໂນ​ໂລ​ຊີ ​ແລະ ອື່ນໆ, ການ​ຍອມຮັບ ​ແລະ ​ເຄົາລົບ​ສິດ​ຂອງທຸກອາຊີບ​ບໍ່​ພຽງ​ແຕ່​ເຮັດ​ໃຫ້​ສັງຄົມ​ມີ​ຄວາມ​ເປັນ​ເອກະ​ພາບ​ເທົ່າ​ນັ້ນ, ຫາກ​ຍັງ​ຊ່ວຍສົ່ງເສີມການ​ພັດທະນາ​ປະ​ເທດ​ຊາດ​ໃນ​ໄລຍະ​ຍາວ​ນານ.